Huset vart bygd av den rikaste mannen i landsbyen. Det stod ferdig i 1759 og blir rekna som det nye huset. I morgon et me frukost i den gamle delen, som er frå 1674.
Ekteparet som bygde huset var barnlause, og då ho, Kristin Kongstun, vart enkje, vart det selt til Jaunsen, som kom hit frå Estland via Hanseatene. Han hadde arbeidd for ekteparet og fekk dermed lov til å kjøpa det.
Fram til 1925 vart det brukt som hotell/skipsstasjon. Då vart det utkonkurrert av det nye hotellet, Melands hotell. Det låg der sjukeheimen ligg i dag, det store gule huset på veg ned til fjorden.
Så hoppar me fram til 1985, det mørke året i Granvins historie. Bygda har rundt 1000 innbyggjarar, og var innfallsporten til Hardanger, det var her ferja kom inn, og det var her det var eit sidespor frå Bergensbanen, eit elektrisk tog som gjekk frå Voss og ned til Granvinsfjorden.
I 1985 slutta ferja å komma, toget vart innstilt, og hotellet, Melands hotell, brann ned.
Alle kafeane og butikkane ved fjorden stengde. Det var ei mørk og trist tid i Granvin.
Etter tre år bestemde to damer seg for at noko måtte gjerast. Dei fekk førti personar til å bidra med 1000 kroner kvar og kjøpte dermed Jaunsenhuset og tinghuset. Mottaksområdet vart bygd, og heile bygda bidrog med dugnadsarbeid. Etter to år opna dei opp.
Deretter vart hotellet drive på frivillig basis i ti år, leid ut til folk som dreiv det. Dette vart ingen økonomisk suksess. Banken sa at det måtte seljast til nokon som ville driva det vidare. Jaunsa vart så seld til Kåre Lie, som var ei drivande kraft. Han bygde også puben, som ligg i enden av tinghuset, det vil seia ut og til venstre. I sommarsesongen er puben open fredagar og laurdagar frå 20-24.
I 2015 var Kåre Lie sliten og la Jaunsen Gjestgjevarstad ut for sal. Ingen ville kjøpa han, han låg ute på marknaden i over eit år, og prisen vart sett ned litt etter litt.
Den nye eigaren, Eli Stangeland, var i Stavanger då ho fann Jaunsen på Finn.no. Deretter gjorde ho ein avtale om å komma og sjå på hotellet. Ein laurdag formiddag i byrjinga av november 2016 kom ho, vart der i fire timar og kjøpte det der og då.
Ho kom til Granvin i januar 2017, og har drive Jaunsen sidan den gongen. Hennar signaturrett er brødet, som uoffisielt har vorte kåra til Noregs beste hotellbrød.
